

Ansoleaga Karrika 9. zkia 31001 Iruñea - zaldikomaldiko@gmail.com
Aupa lagunak.
Hurrengo ostegunean, ekainak 5, arratseko 20:30ean Joseba Irazoki abeslari beratarraren kantaldia izanen dugu Zaldiko Maldiko elkartean.
Eskerrik asko eta animatu etortzera!
Elkarteko taberna irekita egonen da, kontzertua entzun bitartean trago bat hartzeko!!
Maiatzaren 16an, ostiralarekin, arratseko 8etan, Edorta Agirre idazle bizkaitarrak eta Asisko Urmeneta diseinadore grafikoak Elikadurari buruzko apostuak izeneko hitzaldia eskainiko dute Zaldikon.
Hitzaldi honek Agirrek eta Urmenetak elkarrekin argitaratutako Baietz okerreko bidea aukeratu! izeneko liburuan du abiapuntua eta azken urteotan gure gizartean zabaltzen ari diren elikadura-ohitura gaiztoei buruz gogoeta egitea du helburu, Edorta Agirreren ikuspuntu kritikoa eta Asisko Urmenetaren marrazki eta ateraldi umoretsuak ederki uztartuz.
Edorta Agirre euskal itzultzailea da ofizioz eta sukaldaritza-kazetaria afizioz. Hainbat liburu eta artikulu argitaratu ditu euskal sukaldaritzari buruz eta elikadurari buruz.
Asisko Urmeneta, berriz, Euskal Herriko marrazkilari eta diseinadore grafiko ezagunetako bat da. Kukuxumuxu enpresako langilea da eta hainbat eta hainbat lan egin ditu diseinu grafikoaren arloan.
Ondoren, afari irekia izanen da Zaldikon bertan, Edorta Agirre sukaldariak bakailaoa hainbat maneratan prestatuko baitu (entsalada, ajoarrieroa, bakailao egosia etab.).
Afarirako apuntatzeko, telefono honetara deitu: 948 21 13 63 (Sergio).
Agur denori,
Mezu honen bitartez jakinarazi nahi dizuegu Zaldiko Maldikoko bazkideok urtero banatzen den Lamien Urrezko Orraziaren 2007. edizioa Tuterako Argia Ikastolari ematea erabaki dugula .
Erabakia urtero egiten den bazkidearen egunean hartu genuen.Izan ere, Argia Ikastolak, Euskal Herriko erriberan, euskararen argia piztuta zaintzen du. Bide batez, sari honen bitartez elkartasuna adierazi nahi diegu Argia Ikastolako ikasle, langile eta gurasoei duela hilabete batzuk jasan zituzten pintadak eta mehatxuak direla eta. Hain zuzen ere Asto-Masto saria, pintada horiek egin zituztenei dagokiela adostu zuten Zaldiko Maldikoko bazkideek. Sarien banaketa maiatzaren 6an, asteartearekin, arratseko 8:15tan izanen da Ansoleaga karrikako lokalean. Ohartxo honen bitartez horra agertzeko gonbitea luzatzen dizuegu.
Izan ongi,
Zaldiko Maldikoko Juntakideak
Honen inguruko berriak: Berria-n Gara-n